Hvað á að vera í leikskólatöskunni ? 
Nauðsynlegt er að börnin hafi föt til skiptanna (buxur, bol, sokka, nærbuxur, sokkabuxur) í tösku í hólfum sínum. Auk þess þurfa börnin að hafa pollagalla, stígvél, hlýja ullarpeysu, vettlinga og annan útiverufatnað. Mikilvægt er að foreldrar merki föt barna sinna. Dýrmætur tími getur farið í að velta fyrir sér hver á hvaða flík og afleiðingar þessa geta orðið þær að dýr fatnaður glatast. Munið því að merkja öll föt vel!  Foreldrar eru beðnir að tæma hólf barna sinna á föstudögum. Í leikskólanum er unnið með ýmis leikefni svo sem málningu og lím og þarf val foreldra á fatnaði barnanna að taka mið af því. Börnin nota svuntur, t.d. við að mála, en oft duga þær ekki alveg. Foreldrum er bent á að þekjulitir eiga að nást úr fötum séu þau þvegin úr köldu vatni.

Veikindi barna.  
Vinsamlegast tilkynnið veikindi, frí eða önnur forföll barna til leikskólans, helst fyrir kl. 9:00. Foreldrar verða að greiða fyrir þann tíma sem börnin eru fjarverandi dag og dag vegna veikinda. Ef um langvarandi veikindi er að ræða gilda aðrar reglur. Einnig skal minna á að foreldrar geta beðið um að barnið taki ekki þátt í útiveru í einn dag eftir veikindi. Börn sem hins vegar geta ekki verið úti sökum veikinda eiga að vera heima. Vikið er frá þessum reglum ef um er að ræða barn með slæman asma eða þegar barn er að ná sér eftir alvarleg veikindi, t.d. lungnabólgu. Trúnarðarlæknir leikskólanna er Katrín Davíðsdóttir.